Көктем мен жаз айларында адамдардың арықтарда, каналдарда, өзендер мен көлдердің тыйым салынған аумақтарында қауіпсіздік ережелерін сақтамай жаппай суға шомылу маусымы басталатыны белгілі. Өкінішке орай қауіпсіздік ережелерін сақтамау, арнайы белгіленген жерлерден тыс суларда шомылудың арты орны толмас қайғылы оқиғаларға алып келетіні баршамызға белгілі. Осыған орай, Сауран ауданындағы өзендердің жағасына шомылатын жұртшылыққа аудан және ауылдық округ басшылары төмендегідей хабарландыру жасап отыр.
Осындай жағдайларды болдырмау, алдын алу мақсатында тұрғындарды суға шомылатын жердің тереңдігі мен ағыстың қаттылығын мұқият тексеріп алу, суға тек қана рұқсат етілген жерлер мен аймақтарда шомылу, тыйым салынған жерлерде шомылмау, шомылып жүрген балалар мен қасыңыздағы адамдарды көзден тасада қараусыз қалдырмау, арнайы қоршау белгілерінен тысқары жүзбеу, су ағысындағы иірімдерге қарай жүзбеу, суда ұзақ уақыт жүзбеу, жүзу кезінде шаршап жағаға шыға алмайтын болсаңыз дауыстап көмекке айналадағы адамдарды шақыру, суға түсерде кезінде көпірлерден биік жерлерден секірмеу, әртүрлі алкогольдік ішімдіктерді ішіп суға шомылмау сияқты ережелерді қатаң сақтауға шақырамыз.
Суда қауіпсіз демалу адамның өзін-өзі ұстау тәртібіне байланысты.Өзіңізді және отбасыңызды қорғау үшін мынадай ұсыныстарды орындау қажет:
1. Тек арнайы бөлінген орындарда, жабдықталған жағажайларда шомылыңыз, қауіпті жағдайда сіз құтқарушының мамандандырылған көмегін ала аласыз. Қалада шомылуға рұқсат етілген орындар: Орталық жағажай, «Три пескаря» және «Астаналық аула» демалыс орындары.
2. Мас күйде шомылмаңыз. Бұл – судағы адам өлімінің негізгі себебі.
3. Қайықтарға жақын жүзбеңіз.
4. Қайықтар мен басқа да жүзу құралдарын пайдалану ережелерін сақтаңыз: оларға шамадан тыс күш түсірмеңіз, шайқамаңыз, олардан суға секірмеңіз, қайыққа қажет болған жағдайда алдынан немесе арт жағынан көтерілу керек. Есіңізде болсын, қайықта отырғандардың арасында бір адам жүзе алмауы мүмкін.
5. Жүзе алмаған жағдайда үрлемелі матрастарды, камераларды, тақталарды қолданбаңыз. Тіпті ақырын соққан жел оларды жағадан алыс алып кетуі мүмкін.
6. Егер сіз жүзе алмасаңыз, суға тек белбеу арқылы түсіңіз.
7. Шомылуға арналған орындарда арнайы орнатылған қоршаулардан асып жүзбеңіз. Бұл – ескерту белгісі. Ұзақ жүзу – бұл гипотермия, бұлшықеттің шамадан тыс жұмысы, дененің құрысып қалуы, ал оның соңы өлімге әкелуі мүмкін.
8. Суда ерсі әрекеттер жасамаңыз. Суға малтып, жүзіп жүргендерге тап бермеңіз, өзгелерді қорқытпаңыз.
9. Жалған апат сигналдарын бермеңіз.
10. Балаларды ересектердің қарауынсыз қалдырмаңыз.
Жас балалардың суға шомыла білмеуі, адамдардың суда қауіпсіздік ережелері, шараларын орындамауы орны толмас қайғы мен өкінішке айналып жатады. Сондықтан осындай келеңсіз оқиғаларды болдырмау үшін, төмендегі ережелерді орындаған жөн:
I. Суда шомылудың қауіпсіздік шаралары
— Суға шомылатын жерді, жалпы жағдайды судың тазалығын, тереңдігін мұқият тексеріп алыңыз.
— Тамақ ішкеннен кейін бірден шомылмаңыз.
— Суға тек қана рұқсат етілген жерлер мен жағажайларда шомылыңыздар.
— Өте ұзақ шомылмаңыз, өзіңізді шаршауға және тоңып қалтырауға дейін жеткізбеңіз.
— Суға түскенде бір-біріңізді көзден таса қылмаңыз.
— Қоршау белгілерінен, буйлардан тысқары аумаққа шықпаңыз.
— Техникалык ескерту белгілерінің, буйлардың және басқалардың үстіне шығушы болмаңыздар.
II. Көлдерде, тоғандарда, тоқтау сулар мен шалшық суларда шомылудың қауіптері
Өзендер мен көлдерде, тоғандарда, тоқтау сулар мен шалшық суларда шомылудың қауіпі мол, себебі инфекциялық аурулардың қоздырғыштары ағын суда: Іш-сүзегі 183 тәулік, дизентерия 12-92, оба 4-92, туляремия 7-31, бруцеллез 4-45 тәулікке дейін өмір сүреді.
III. Аяқ-қол тырысуы (судорога) болғанда сіздің іс-әрекетіңіз
Суық суда шомылу қол-аяқтың тырысып қалуына әкеліп соғады.
— егер тырысу болғанда жүзуді тоқтатып суға арқаңызбен шалқалай жатыңыз, сабырлық сақтаңыз.
— Қолыңыздың саусақтары тырысып қалғанда жұдырығыңызды түйіңіз, қолыңызды бір жаққа қарай серпе лақтырып, жұдырығыңызды ашыңыз.
— Балтыр бұлшық еті тырысқанда бүгіліп қолыңызбен аяғыңыздың басын қысып бар күшіңізбен өзіңізге қарай тартыңыз, немесе аяғыңызды судың астына созып, аяғыңыздың бармақтарын алға иіңіз. Содан соң балтырыңызды сылаңыз.
— Тырысу қойысымен тынығып алып, жүзудің басқа әдісімен жағаға шығыңыз.
IV. Су иірімінен шығудың тәсілдері
— Егер иірімге тап болсаңыз, кеудені кере дем алып, иірімнің астына сүңгіңіз.
— Судың астында иірімнен алысырақ кетуге тырысыңыз.
— Иірімнен алыстаған соң судың бетіне қайта шығып жағаға қарай жүзіңіз.
V. Суда қатты шаршаған кездегі іс-әрекет
Суда ұзақ шомылу шаршап — шалдығуға әкеліп соғады.
— Егер суда шарашасаңыз немесе тоңсаңыз тез арада жағаға қайтыңыз. Сабыр сақтаңыз.
— Әлсін — әлсін шалқалай жатып дем алыңыз, күшіңізді үнемдеңіз, өзіңізді және уақытты бақылау үшін, жаймен дауыстап санаңыз.
— Егер өз күшіңізбен жағаға жете алмайтыныңызды сезінсеңіз шалқалай жатып қолыңызды бұлғап көмекке шақырыңыз.
VI. Суық судың қауіптілігі
Суық суға түсіп кеткен адам 10-30 минутта көбіне суық өтіп қайтыс болады (5-7С 2-ші дәрежелі гипотерамия). 5-15 минут қимылсыздық суықтан талуға (шок) және өлімге әкеліп соғады. Суық судан шығарылып, аман қалғанның өзінде жиі-жиі есінен танады.
Организімнің жалпы салқындауы қатты шаршағанда, ашыққанда, мас күйінде тезірек болады. Физиологиялық ерекшеліктеріне байланысты әйелдер суық суға төзімдірек болады, ерлер 4-5 минуттан соң-ақ жүректері тоқтап қалуы мүмкін. Суық суда клиникалық өлім 30-60
минутқа, жылы суда 5-6 минутқа созылады. Тұщы суға батқан адам 1-3
минутта, ал теңіз суында 7-8 минутта қайтыс болады. Сондықтан суық суда әрбір секунд қымбат.
VII. Судағы қатерге ұшыраған адамға алғашқы көмек
Қатерге ұшыраған адамға көмек көрсеткенде мүмкіндігінше тездетіп оттегі жетімсіздігін қолдан дем алдыру тәсілін қолдану арқылы жойыңыздар.
— қатерге ұшыраған адамды судан алып шыққаннан кейін оның киімін беліне дейін шешіп, демалу жолдарының жоғары жағын және асқазанын судан босатуға кірісу;
— қатерге ұшыраған адамның аузын азу тістерінінің әр жағынан саусақпен қармай, немесе қол орамалмен, не дәке оралған пышақ жүзімен, шай қасықтың сабымен немесе жалпақ темір заттпен ашу керек.
— Ауыз ішін шырыш пен балдырдан тазалау керек.
— Қатерге ұшыраған адамның жоғарғы тыныс жолдары мен асқазанын судан арылту үшін оның кеудесін көмек көрсетушінің тізесінің бүгілген аяғының үстіне басын төмендетіп салып, кеуде сүйегінің астыңғы бөлімдерін ырғақпен қысып баса беру. Ең жеңіл және тиімді тәсіл — «ауыздан — ауызға» немесе «ауыздан — мұрынға» ауа үрлеу. Қатерге ұшыраған адамды бетін жоғары қаратып жатқызып, бір қолды оның мойнының астына жіберіп, екінші қолымен маңдайынан басып, басын мүмкіндігінше шалқайту. Бас бармақпен және сұқ саусақпен қатерге ұшыраушының мұрнын қатты қысып, демді ішке терең алып, оның аузына минутына 18-20 дем салу керек. Қатерге ұшыраушының жүрек соғуын ұдайы қадағалап отыру керек. Егер жүрек соғуы тоқтап қалса қолдан дем алдыру мен қатар, жүрекке тікелей емес массаж әдісін қолдану керек, ол үшін: қатерге ұшыраушының жүрек түсына бір алақанды қойып екіншісін айқастыра салу керек, екі колдың да саусақтары көтеріңкі болу қажет, дене салмағын пайдалана, төс сүйекті омыртқа жотасына қарай 4-5 см қысады, жиілігі минутына 70-72 рет.
Есте сақтаңыздар!
Судағы апаттан қорғанудың ең сенімді жолы — суда шомылу ережелері мен қауіпсіздік шараларын қатаң сақтау.