Заңды білу – өз құқығыңды қорғаудың ең сенімді жолы. Бұл қағида елімізде жыл сайын дәстүрлі түрде ұйымдастырылып келе жатқан «Халық заңгері» жалпыреспубликалық акциясының негізгі ұстанымы. 2025 жылдың 30 мамырында Қазақстанның барлық өңірінде бір уақытта бастау алған бұл шара азаматтарға құқықтық қолдау көрсетіп, қоғам мен билік арасындағы ашық әрі нәтижелі диалог алаңына айналды.
Осы ауқымды акция аясында Түркістан облысының Төлеби ауданында да мазмұнды шара ұйымдастырылды. Аудандық мәдениет үйінде өткен жиынға аймақтың құқық қорғау органдары мен мемлекеттік мекеме басшылары, сала мамандары, жергілікті халық пен БАҚ өкілдері қатысты.
Заң үстемдігі – тұрақтылық кепілі
Іс-шараның негізгі мақсаты – азаматтардың құқықтық сауаттылығын арттыру және оларды толғандырған мәселелерге тегін, әрі кәсіби заң көмегін ұсыну. Акция аясында әрбір тұрғын нотариустардан, адвокаттардан, прокурорлардан, тергеушілер мен сот орындаушыларынан бастап, әкімдік пен басқарма қызметкерлеріне дейін барлық жауапты тұлғалармен бетпе-бет сөйлесіп, кеңес алды.
Төлеби ауданында өткен жиынға Түркістан облысы Әділет департаментінің басшысы Нұржан Махамбетов, аудан әкімінің орынбасары Лесбек Серікбаев, аудандық соттың төрағасы Ғани Байарыстан, аудан прокуроры Дастан Мырзағали, аудандық полиция бөлімінің басшысы Ғалымжан Қуашбаев, сондай-ақ сыбайлас жемқорлыққа қарсы іс-қимыл департаментінің Сарыағаш аймағы бойынша басқарма өкілдері, экономикалық тергеп-тексеру департаментінің қызметкерлері қатысты.
Ашықтық пен әділеттілікке жол
Акция кезінде тұрғындар тұрғын үй мәселелері, алимент өндіріп алу, жер дауы, зейнетақы мен әлеуметтік көмек, азаматтық және қылмыстық істерге қатысты сауалдар бойынша жан-жақты кеңес алды. Әсіресе, отбасылық құқық, мұрагерлік, еңбек қатынастары, кәсіпкерлік және жылжымайтын мүлікке қатысты сұрақтар көптеп қойылды.
Тұрғындар өз сұрақтарын тікелей сала мамандарына қойып, бұрынғыдай бірнеше мекемені жағаламай-ақ, бір жерде кәсіби, тегін, әрі түсінікті жауап алды. Бұл – халықтың мемлекеттік институттарға деген сенімін арттырудың және құқықтық мәдениетті қалыптастырудың нақты көрінісі болды.
Құқық – әркімге ортақ қорған
Акцияның ерекшелігі – оның практикалық бағыттылығы. Мұнда тек заңдық түсіндіру ғана емес, сонымен бірге кейбір күрделі мәселелер бойынша алдын ала шешу жолдары, қажетті құжаттар тізімі, сотқа дейінгі әрекеттер мен құқық қорғау механизмдері нақты көрсетілді. Кей жағдайларда мамандар тұрғындарды тікелей өз құрылымдарына шақырып, нақты істерді қабылдауға дайын екендіктерін білдірді.
Азаматтар алғысын білдірді
Іс-шара соңында белсенділік танытқан сала өкілдері мен ұйымдастырушыларға алғыс хаттар табысталып, тұрғындар тарапынан жылы лебіздер айтылды. Көпшілік осындай шаралардың жиі өтуі қажеттігін, бұл өзекті мәселелердің шешілуін жеделдететінін және қоғамдағы сенім атмосферасын қалыптастыратынын жеткізді.
«Халық заңгері» – бұл жай ғана құқықтық кеңес беру емес, бұл – азамат пен мемлекет арасындағы ашық, әділетті диалогтың нышаны. Әрбір азамат өз құқығы мен міндетін білетін, заң алдында тең қоғам құру – бүгінгі Қазақстанның басты қағидаты. Ал мұндай бастамалар – осы қағидатты шын мәнінде жүзеге асыруға бағытталған нақты қадам.