– Қазір мұндай несиесі бар азаматтарға мемлекет тарапынан жеңілдік жасалып жатыр емес пе?
– Дұрыс айтасыз, мерзімді әскерге шақырылған азаматтарға екінші деңгейлі банктер алдындағы несиесін өтеу кейінге қалдырылады. Бұл уақыт 13 ай деп көрсетілген. Ал, қосымша бір ай әскерден келгеннен кейін жұмысқа орналасу үшін беріледі. Мұнан бөлек әскерден келген жастарға жоғары оқу орнына түсуге мүмкіндік жасалып отыр. Яғни жоғары оқу орнына түсуге ниетті әскерден келген азаматтарға тегін грант беріледі.
– Жалпы, жастардың әскерге деген құлшынысын арттыру үшін не істеу қажет? Әскердің әлеуетін көтеру үшін мемлекет тарапынан қандай бастамаларды қолға алған жөн?
– Ақты – ақ, қараны – қара деп айтуымыз керек. Біздің әскерге алғаш барғандағы уақыт пен қазіргі әскери даярлық, қару-жарақпен қамтылу деңгейі жер мен көктей. Отыз жылдан аса уақыт ішінде қарулы күштеріміз қаншама реформаны бастан өткерді. Техникалық жарақтандырудан бөлек әскерилердің әлеуметтік-құқықтық жағынан қорғалуы, техникалармен жабдықталуы сияқты мәселелердің заңдық негіздері жасалды. Қорғаныс министрлігінің ұсынысымен заңдарға өзгертулер мен толықтырулар енгізілді. Қаржыландыру деңгейі де жыл сайын көтеріліп келеді. Жаңадан әскери доктрина қабылданды. Қазақстан сарбаздары мен офицерлері бітімгершілік миссияларына қатысып, оны абыроймен атқарып келеді. Халықаралық әскери келісімшарттарға сәйкес, әртүрлі мемлекеттерде өтетін әскери оқу-жаттығу жиындарына жүйелі түрде қатысуға мүмкіндік бар.
Қазір Президент тапсырмасымен әскери салада реформа жүргізіліп жатыр. Менің айтпағым, әскери адамдардың әлеуметтік жағдайы жақсы болуы керек. Олардың
еңбекақылары отбасын асырауға толығымен жетуге тиіс. Үй, пәтермен қамтылуы қажет. Қызмет аяқталып, зейнеткерлікке шыққанда оның зейнетақысы одан кейінгі өмірінде дұрыс өмір сүруін қамтамасыз етуі керек. Зейнетке шыққан соң зейнетақысы отбасын асырауға жетпей, басқа жұмыс істемеуі қажет. Міне, үкіметіміз осыны дұрыс есептеуі керек.
«Ұранды ердің ұрпағы қайсар болады» деген қанатты сөз бар. Сондықтан еліміздің мектептерінен бастап орта және жоғары оқу орнындағы жастармен әскери-патриоттық тәрбиені дұрыс, жүйелі жүргізуіміз қажет. Әсіресе, алғашқы әскери дайындық пәнінің мәртебесін көтеру керек. Ол пәнді оқулықсыз емес, арнайы оқулықпен оқытқан жөн. Бұл жөнінде Оқу-ағарту министрлігі мен Қорғаныс министрлігінің жұмысын Үкімет дұрыс үйлестіргені жөн.
– Әскери борыш – абыройлы міндет. Осы тұста жастарға әскери борыш туралы қандай ағалық ақыл айтар едіңіз.
– Әрбір ер азамат үшін ең басты міндет – Отан алдындағы борышын өтеу екені сөзсіз. Отанды қорғау – мына сіз бен біздің міндетіміз. Тепсе темір үзетін кез келген азамат осыны түсінсе деймін. Сондықтан өскелең ұрпақ өз отбасын қалай қорғаса, еліне де солай қорғаныш болуы қажет.
– Әңгімеңізге рақмет!
Әңгімелескен Дәулет ТҰРСЫНҰЛЫ