«Әділет» партиясының Түркістан облыстық мәслихаты депутаттығына кандидаттарының сайлауалды штабының мүшелері Отырар ауданына қарасты Шәуілдір ауылында жергілікті тұрғындармен кездесті. Басқосуға партияның облыстық филиалының төрағасы, облыстық мәслихат депутаттығына кандидат Алмас Салимов, штаб мүшелері, сондай-ақ облыстық және аудандық мәслихат депутаттығына кандидаттар қатысты.
Кездесудің негізгі мақсаты – партияның 2026–2031 жылдарға арналған сайлауалды бағдарламасының басым бағыттарын таныстыру, өңір мен ауданның әлеуметтік-экономикалық дамуына қатысты жоспарлармен бөлісу және тұрғындардың ұсыныс-пікірлерін тыңдау. Жиын барысында инвестиция тарту, жаңа өндіріс орындарын ашу, кәсіпкерлікті қолдау және халықты тұрақты жұмыспен қамту мәселелеріне ерекше назар аударылды.

Партия өкілдері алдағы бес жылда Түркістан облысының экономикалық әлеуетін арттыруға бағытталған бірқатар инвестициялық жобаны жүзеге асыру жоспарланып отырғанын жеткізді. Бұл бастамалар өңірде өндіріс көлемін ұлғайтып қана қоймай, жаңа жұмыс орындарын ашуға, жергілікті кәсіпорындардың дамуына және тұрғындардың табысын арттыруға мүмкіндік береді.
Аталған жоспарлар аясында Отырар ауданында да бірқатар инвестициялық жобаны іске асыру көзделген. Олардың жүзеге асуы аудан экономикасының жандануына, кәсіпкерлік белсенділіктің артуына және жергілікті тұрғындарды жұмыспен қамту мүмкіндіктерінің кеңеюіне ықпал етпек. Әсіресе ауылдық елді мекендерде жаңа кәсіп бастауға және өндірістік бағыттарды дамытуға жағдай жасау маңызды міндеттердің бірі ретінде белгіленген.
«Отырар ауданының ауыл шаруашылығын дамытуға, кәсіпкерлік пен шағын өндірісті өркендетуге әлеуеті зор. Біздің мақсатымыз – осы мүмкіндіктерді тиімді пайдаланып, нақты жобаларды жүзеге асыру. Инвестициялық бастамалардың іске қосылуы аудан үшін жаңа жұмыс орындары мен қосымша табыс көздерін қалыптастыруға ықпал етеді. Ең бастысы, тұрғындар туған жерінде еңбек етіп, өз кәсібін дамытуға мүмкіндік алуы керек», – деді Алмас Салимов.
Кездесу барысында ауыл шаруашылығы саласын дамыту мәселесіне де басымдық берілді. Отырар ауданының табиғи және экономикалық мүмкіндіктерін тиімді пайдалану, ауыл шаруашылығы өнімдерін өндіру көлемін арттыру, шаруалардың кәсіпкерлік бастамаларын қолдау және өнім өткізу бағыттарын кеңейту өңір экономикасын нығайтудың маңызды тетіктері екені айтылды.
Сонымен қатар партия бағдарламасында шағын және орта кәсіпкерлікті дамытуға, ауыл кәсіпкерлеріне жүйелі қолдау көрсетуге ерекше мән берілген. Бұл бағытта ауылдық аумақтар мен шағын қалалардағы бизнестің әлеуетін арттыру, жаңа кәсіп ашуға ынталы азаматтарға қолайлы жағдай қалыптастыру және жұмыс істеп тұрған кәсіпорындардың қызметін кеңейту көзделіп отыр.
Атап айтқанда, «Іскер аймақ» бағдарламасы аясында шағын және орта кәсіпкерлікті өркендетуге бағытталған бастамалар жүзеге асырылмақ. Мұндай қолдау тетіктері жергілікті кәсіпкерлердің өндірістік мүмкіндіктерін кеңейтуге, жаңа жобаларды қолға алуға және қосымша жұмыс орындарын құруға жол ашады.
Штаб өкілдері экономикалық өсімнің басты көрсеткіштерінің бірі халықтың тұрақты жұмыспен қамтылуы екенін атап өтті. Осыған байланысты инвестициялық жобаларды жүзеге асырумен қатар, жергілікті тұрғындарды еңбекке тарту, кәсіптік мүмкіндіктерін арттыру және жастардың өз ауданында жұмысқа орналасуына жағдай жасау мәселелерінің маңыздылығы түсіндірілді.
Жиын барысында Шәуілдір ауылының тұрғындары ауданның әлеуметтік-экономикалық дамуына қатысты өзекті мәселелерді көтеріп, ұсыныс-пікірлерін ортаға салды. Тұрғындармен ашық форматта өткен пікір алмасу барысында ауыл шаруашылығы, кәсіпкерлік, жұмыспен қамту және елді мекендердің даму перспективалары жөнінде ойлар айтылды.
Өз кезегінде партия өкілдері тұрғындар тарапынан көтерілген мәселелерге тоқталып, сайлауалды бағдарламада қарастырылған бастамалардың мазмұнын түсіндірді. Сондай-ақ жергілікті халықтың ұсыныстары мен сұраныстарын ескеру өңірді дамытуға бағытталған жұмыстардың маңызды бөлігі екені атап өтілді.
Жалпы, Шәуілдір ауылында өткен кездесу Отырар ауданының экономикалық мүмкіндіктерін талқылауға және алдағы кезеңдегі даму басымдықтарын тұрғындарға таныстыруға мүмкіндік берді. Инвестиция тарту, ауыл шаруашылығы мен кәсіпкерлікті дамыту, жаңа жұмыс орындарын ашу арқылы халықтың табысын арттыру – ауданның тұрақты дамуына негіз болатын маңызды бағыттар.