Адал еңбек, адал табыс – бұл жол да оның үлгісі. Оның жетекшілігімен ауылдың бірнеше тұрғыны тұрақты еңбек етуде. Бұл – жекеге ғана емес, жалпы қоғамға пайдасы тиетін игілігі мол іс.
ҚҰРМЕТКЕ ТОЛЫ ҒҰМЫР ЖОЛЫ
Бүгінде Ахметов Төлепберген – елге сыйлы ақсақал, өскелең ұрпаққа үлгі боларлық өмір жолы бар, парасатты тұлға. Ол бірнеше мәрте аудандық, қалалық және облыстық деңгейдегі Құрмет грамоталары мен Алғыс хаттарымен марапатталған, абыройы асқан азамат. Оның сабырлы болмысы, әділдігі, адамға деген кеңдігі – туған-туыс пен ауыл-аймақтың жүрегінен ерекше орын алды.
ӨМІР ЖОЛЫ – ҰРПАҚҚА ҮЛГІ
Отбасы – Төлепберген Ахметұлы өмірінің мәні мен омыртқасы. Жұбайы Мария екеуі үш қыз, екі ұл тәрбиелеп, олардың барлығына тиянақты тәрбие мен сапалы білім берді. Барлық ұл-қыздарының өнегелі, парасатты, ибалы болуы – ата-ананың дұрыс тәлім-тәрбиесінің арқасы болса керек. Төлепберген Ахметұлының өнегелі ғұмыры, елге жасаған қызметі, бала тәрбиесіндегі ұстанымы – кейінгі буынға бағыт-бағдар боларлық құндылық.
Бүгінде Төлепберген Ахметұлы мен Мария Әуесханқызы қыздарын қияға, ұлдарын ұяға қондырып, олардан 19 немере, 1 шөбере көріп отырған бақытты ата мен әже.
Ұл-қыздары – әр саланың майталман мамандары.Айта кетеріміз, ұлдары әке ізін жалғастырса, қыздары аналарының жолын қуған ұлағатты ұстаздар.
Атап айтсақ, тұңғыш қызы Айнұр – «Құмтүйін» мектебінің бастауыш сынып мұғалімі.Ортаншы қызы Ақнұр – Алматы облысы, Алатау қаласы №47 мектептің қазақ тілі мен әдебиеті пәнінің мұғалімі.Кіші қызы Ұлбике – Шекербұлақ ауылындағы Қызылжол орта мектебінің қазақ тілі мен әдебиеті пәнінің ұстазы.
Ал, үлкен ұлы Асылжан – Алматы қаласында жеке кәсіпкер, жүк тасымалдау саласында қызмет атқарады.
Қарашаңырақтағы кенже ұлы Нұрболат – әке жолын жалғастырып, Сауран ауылдық округінде егін шаруашылығымен айналысатын жекекәсіпкер.
Төлепберген Ахметұлы – жанұясы мен халқының алғысына бөленген, өнегелі өмірімен кейінгі буынға өшпес үлгі қалдырған тұлға. Еңбегімен еленіп, парасатымен танылған азаматтың 70 жылдық мерейтойы – ел үшін де, ұрпақ үшін де айрықша құрмет.
ТЕКТІ ЖЕРДІҢ ПЕРЗЕНТІ – ХАЛЫҚТЫҢ СҮЙІКТІ АЗАМАТЫ
Өмірін адал еңбекпен, әділдік, парасат үлгісімен өрнектеген Төлепберген Ахметұлы ағамыз талай адамға үлгі болды. Ол – нағыз еңбек адамы, берекелі отбасының негізін қалаған өнегелі әке, ауылдың риясыз қызметкері, елге сыйлы азамат. Оның өмір жолы – жас ұрпаққа, ауыл-ауылдарға, жалпы қазақстандық қоғамға үлгі.
Сонымен қатар, мемлекет тарапынан еңбекқор азаматтар мен кәсіби мамандарға көрсетіліп жатқан құрмет – Төлепберген ағамыз сияқты адал еңбек еткендерге көрсетілген лайықты баға деген ойдамыз.
ТӘЛІМ – ЕҢБЕК – ӨНЕГЕ
Төлепберген Ахметұлы – туған топырағына, отбасына, еңбегіне адал болған қадірлі қария.
Осы мақаланы жазу барысында Төлепберген Ахметұлының өмірі мен еңбек жолына қаныға отырып, отбасы тәрбиесіне, адал қызметіне, ұлттық идеямен үндес ар-ұждан қағидаттарына тәнті болдық. Адал еңбек еткен адам – қашанда елдің жүрегінде. Бұл қағидат оның бүкіл ғұмырының мазмұны.
Оның өнегелі өмірі – кейінгі ұрпаққа бағдар, ортақ тарихымыз бен болашағымызға деген жауапкершілік екенін ұғындық.
Еңбекке адалдықтың, отбасыға беріктіктің, туған жерге қызмет етудің, сабырлылықтың, парасаттың жарқын үлгісін көрсеткен Төлепберген Ахметұлының өмір жолы – еңбек адамын қадірлеген қазақ даласының айнасы, отбасы мен ұрпақты биік қоя білген азаматтың шынайы шежіресі. Ендеше, Төлепберген Ахметұлының мерейтойы – тек бір адамның өмір белесі емес, ұзақ жылғы адал еңбектің, адамдық қасиеттің, парасат пен тәрбиенің салтанаты.Бүгінгі жазған мақаламыз – тек бір адамның өмірбаяны емес,қазақтың еңбекқорлығы, адалдығы, отбасылық құндылығы жөніндегі үлкен тағылым. Еңбек ардагері Төлепберген Ахметұлы ағамызды 70-тің жотасына шыққан мерейлі жасымен құттықтай отырып, ауданымыздың өсіп-өркендеуіне қосқан үлесіне, қоғамдық жұмыстарына алғыс айтамыз және деніне саулық, отбасына амандық, береке-бірлік тілейміз.